本文重點
近年私人拍賣會成為業主放售單位的理想途徑之一，就連單位出租，業主都會拎出來拍賣以「價高者得」形式放租，Vincent就八到，好似山頂施勳道嘅卓能山莊就有一幢洋房，將會喺下星期一以公開拍賣形式放租，月租金開價15萬元，計落每方呎月租只係28.3元，比市價足足低超過20%，間屋嘅面積有5,300方呎，仲有埋3,900方呎花園同泳池，以及1,400方呎天台。
車位成交半年最多
除咗咁筍嘅山頂洋房外，同場仲有多個元朗區銀主村屋拍賣，單位面積由101至340方呎，開價由最平嘅5萬元，去到最貴嘅亦都只係15萬元。
近期投資市場嘅氣氛好咗，吸引唔少投資者喺樓市積極尋寶，除咗炒賣住宅外，車位亦成為投資者吸納目標，港置李志成同Vincent講，四月份錄得嘅車位成交量同金額都創咗近半年單月新高，期內有523宗車位成交，涉及金額達2.78億元，分別按月急升48%及1倍；當中以價值30萬至50萬元車位成交佔最多，達317宗，高佔整體超過六成。
（Vincent Lau）