本文重點
出嚟做嘢周時都要寫Proposal（計劃書）畀老闆過目，原來滙豐銀行零售網絡主管韓克強喺屋企都有呢鋪癮，但就唔係佢寫，係叫佢囝囝寫，而呢份計劃書嘅目的就好簡單，就係要求加零用錢！
要囝囝寫計劃書
話說嗰陣韓克強嘅囝囝只係小學三年級，但就強烈要求加零用錢，韓克強二話不說就叫佢寫份計劃書嚟睇吓先！阿仔亦好努力喺份計劃書度訴苦，仲話依家嘅零用錢唔夠日常開支，連買支汽水都唔夠錢咁話！
估唔到小三嘅囝囝已經咁識動之以情，說之以理。韓克強雖然唔記得囝囝當時要求加幾多，不過最後都接納咗佢個要求！
話時話，韓克強之前一直係幫渣打做嘢，加入滙豐唔夠半年，尋日見到記者都高呼自己係「新仔」一名。佢又分享之前喺台灣做嘢，多得當地規定唔准非國民投資，令佢避過金融海嘯一劫，如果唔係睇怕都變咗大閘蟹！
余絲韻