本文重點
AIG陷入財困之後，個名已經謝咗，子公司佗住佢個名無運行，所以做非壽險服務嘅AIU同埋喺香港做人壽出晒名嘅美國友邦保險（AIA）都話要分拆上市。
AIG Tower傳改名
作為保險界嘅一哥，AIA出手快夾狠，佢哋仲打算改埋中環AIG Tower個大廈名，實行劃清界線。AIA喺香港有幾棟寫字樓大廈，其中一棟喺中環干諾道中嘅AIG Tower，據聞AIA唔想畀人有覺得佢哋同AIG財務咁頭痕，所以棟大廈好快就會改名，聽講依家AIA手上已經有一堆新名，但係就頭痛緊揀邊個最好。改名唔難，改個好名先至難，相信管理層都要諗過度過先得！
其實AIA去年十月嗰時有諗過改集團標誌，由原本中間有座山嘅標誌，改到同AIG差唔多，正正經經係集團名咁樣。之但係新標誌就快面世時，就爆出AIG陷入財困，要華府出手打救。AIA當時要面對客戶可能斷供保單，要費一番唇舌先留得住班客人，一動不如一靜，加上新標誌本身又同AIG嗰個咁似，所以計劃都係停一停先，冇改到個標誌。
余絲韻