本文重點
柯清輝尋日喺股東大會上榮休，卸下恒生銀行（00011）副董事長兼行政總裁之職，好多股東勁讚佢，全場拍爛手掌，佢哋嘅董事長錢果豐仲畀99分佢添！繼任人梁高美懿（梁太）面對珠玉在前，除咗承諾會秉承柯大俠嘅優良傳統，仲希望可以做到99.5分！
尋日嘅股東大會確實係好感動，全場董事及股東對柯大俠嘅歷年苦心經營有讚無彈，有股東仲叫佢「冧莊」留低，急流勇退嘅柯大俠就喺大片鼓掌及歡呼聲下名垂青史。柯大俠尋日仲落柯打，話邊位員工鍾意就搵佢影相，親民本色猶在。
錢果豐畀99分考起梁太
表明從來唔畀人100分，畀自己都係77分嘅錢果豐，佢對柯先生嘅彪炳戰績給予99分嘅肯定，不過都不忘讚梁太同樣出色，相信恒生兩、三年後會再創高峰咁話！
梁太表明佢會好勤力做，佢喺滙豐31年嘅成績大家有目共睹，希望大家繼續支持佢，佢坦言頭幾個月暫唔打算將恒生改頭換面，大規模裁員更加無諗過，反而睇吓使唔使請人，亦會進一步拓展內地業務。
強調目前最緊要係同團隊、客戶溝通多啲嘅梁太，笑言美國總統奧巴馬都做咗100日先被論功過，仲話佢嘅掌舵只有Evolution（演變）冇Revolution（革命）。雖然梁太謙稱要青出於藍唔易，不過正所謂巾幗不讓鬚眉，相信梁太100日後會帶嚟令人滿意嘅成績。
余絲韻