呢輪又係捉住隻鎊嚟炒，雖然隻歐元都升，但我對於揸歐元始終冇信心，所以睇淡美元嘅話就揸英鎊，睇好美元先至沽歐元。不過，呢輪股市係咁升，英鎊、澳元同加紙就係咁創今年新高，梗係順勢追住隻波幅大嘅鎊嚟炒啦。前晚我見隻鎊企住喺1.51邊，覺得佢隨時再挾上去，所以喺1.5113揸咗一手，但結果唔係升好多，最後喺1.5143止賺。夜晚聯儲局主席「白藍黑」話，美國經濟喺年底前復甦，但市場冇乜反應，道指仲要跌十幾點收市，啲外幣都乘機回番落去，隻鎊穿過1.5050，好彩都企番穩，不過我都係決定唔揸貨過夜。
尋日朝八點零鐘起身，見隻鎊已經穿咗1.5050，食完個早餐之後，見隻鎊都係冇乜起色，決定等多陣，睇吓會唔會試1.50關口，結果九點幾十點就穿位，但係沽壓唔大，我見由高位計都跌咗成百點，除非係大型突破，如果唔係，隻鎊唔會喺亞洲市形成趨勢市，以咁嘅跌幅，隨時反彈都有之，所以後來決定博一博，喺1.5010揸咗一手，穿前日個day low先至止蝕。好彩之後隻鎊都彈番上去，下晝喺英國公布四月份服務業PMI之前上到1.50七、八十，所以嗱嗱聲食咗算！
蘇小妹