恒指早段走勢較為反覆，一度下跌162點至16,268點，期貨場更逼近萬六邊緣，呢吓詐死呃到唔少淡友落疊，下半場被狠狠懲戒。下半場見亞太區其他魚缸係威係勢，獅城魚缸升5%，祖國魚缸亦回復升勢，本地魚缸好友見形勢大好，即展開追殺淡友行動，市場繼續漠視一切利淡消息。
資金源源湧入魚缸
恒指衝破16,800點，報收16,834點，升404點；國企指數亦升148點，報收9,750點。現貨場成交額回升至804億元，今次升浪明顯係資金推動，港元匯價近日維持在金管局強方兌換價，已反映大量資金持續流入。
大笨象（00005）早已供股集資，花旗嘅錢莊壓力測試咁多錢莊需要向市場伸手，反映大笨象管理層先知先覺，加上公布派首季度股息8美仙，亦吸引好息之徒入貨，昨日股價勁升6.3%，報收61.3元，成為魚缸火車頭。紅色錢莊無咁好彩，建行或被美銀沽售，股價逆市跌0.4%，報收4.75元。以往經驗話畀我哋知，當紅色錢莊完成配股，通常股價都會向上，估計建行亦唔例外。不過，另一集資緋聞主角招行（03968）無咁好彩，皆因傳聞要供股，加上唔係國有錢莊，未必咁好彩好似工行（01398）同中行（03988）有社保基金接貨，股價一度跌5.6%，散場報收15.5元，跌幅收窄至1.5%。
另外兩件指數重磅股祖國移動（00941）同港交所（00388）先跌後回升，前者升近1%，報收73.8元，後者更勁升5.5%，報收106元，連續第三個交易日企穩在250日線之上。講真古勝認為港交所現價確係偏高，但好友要挾淡倉，港交所勝在街貨有限兼對指數甚具影響力，即使買貴貨亦唔介意。
在下早已表示唔相信牛市重臨，近日各地魚缸升勢，不過係資金推動，即使花旗經濟最壞時刻或者過去，唔代表從此天下太平，不過大戶要搵對手，既然大部分散戶愈升愈沽，大戶亦唔介意挾爆淡友。在下唔排除大戶再狠啲，要淡友再輸多鋪，所以早於四月初，已呼籲看官牛熊證屬高危產品，寧願炒股唔炒市。
競爭優勢繼續擴大
全球經濟幾時復甦，古勝烏卜卜，穩陣起見，古勝揀受國家政策支持的中資股中化肥（00297），貪佢受惠內地強農惠農政策。北大人呢兩年明顯增加對「三農」的投資，務求令農業生產繼續拓展。新農村建設被大力推動，農民收入顯著提升，他們種糧的收益增加，為化肥行業長期發展提供有利的環境。有關當局推出促進化肥產業持續開發的政策，開放化肥價格，下調化肥出口關稅，令化肥行業發展的市場機制得到增強，有利中化肥充分發揮其競爭優勢，進一步增加其可持續拓展能力。
經過多次購併及項目注資，中化肥以總生產力計，已成為祖國最大化肥生產企業，料其競爭優勢繼續擴大。加上中化肥繼續增強能源資源節省及生態環境保護，大力實行節能減排，減少能源消耗，樹立「綠色化工」的環保榜樣，更值得睇高一線。
古勝