本文重點
金融海嘯令美國投資者損手爛腳，特別係金融股嘅小股東，咁慘當然要搵班高層出嚟祭旗。最新嘅就係美國銀行劉易斯，佢喺股東會被股東踢走董事會主席一職，只留番做行政總裁；大摩嗰班股東就較「友善」，喺股東會上否決分開主席及行政總裁職位議案，相信一身兼兩職嘅麥克暫時可鬆一口氣！
美銀劉易斯失帥位
劉易斯向股東解釋，舊年收購美林證券時未有向股東披露美林巨額虧損，係因為一旦交易拉倒或導致金融體系崩潰，仲話董事局作出該決定時，絕非為保個人利益或厚職。出席股東會嘅2,000名美銀小股東當然唔同意，仲聯同一早聲言要踢走劉易斯做主席嘅加州員工退休基金，劉易斯又有乜辦法唔「起身」。劉易斯能否保住行政總裁職位，就要視乎佢喺美銀嘅未來表現。
除咗美銀，同樣接受美國政府數以百億美元注資嘅花旗集團，若需再籌集更多資本，相信行政總裁潘迪特亦面臨帥位不保嘅危機。
余絲韻