本文重點
豬流感搞到人心惶惶，尋日絲絲去中國旺旺（00151）嘅AGM，佢哋唔單止擺咗招牌零食「旺旺仙貝」，仲好體貼咁放咗幾支叫做「旺旺水神」嘅清潔液，畀大家噴手消毒，聽聞呢個新產品嗰名係由集團主席蔡衍明親自命名。
點解命名為「水神」？根據佢哋嘅產品小冊子講，呢隻產品雖然具有殺菌能力，但同水一樣對人體無害，所以以「水神」為名。「水神」已經被日本官方認定係食品添加物，可直接對食物、水果進行除菌。
近日係業績期高峰期，好多內地上市公司會喺香港以至其他城市做「路演」兼搞埋記者會，但係一場「豬流感」，就令到中鐵建（01186）取消下周一喺香港嘅分析員會議及記者會。
中鐵建業績改期驚感染
內地《財經網》報道，中鐵建董事會秘書李廷柱話，推遲業績會係管理層緊急決定，因為見到香港發現疑似病例，大型集會可能會增加傳染機會。
雖然到依家絲絲仲未聽到有確診個案，但都係小心駛得萬年船。李廷柱仲話，業績會改為全球電話會議，預計會喺下周三或周四召開。
余絲韻