本文重點
「宅男首相」麻生太郎月初話日本要進一步輸出「軟產業」，目標將漫畫、電玩及時裝出口比重由依家嘅2%，提高到18%。其實《哈佛商業評論》5年前已講「The MFA is the new MBA」（藝術碩士是新的工商管理碩士），美國需要嘅唔係滿腦子數字同Guideline嘅MBA，而係有創意嘅人，試諗吓華爾街班精英全部都係MFA+MBA，金融海嘯嘅威力應該更大，又或者美國總統奧巴馬試吓搵個藝術家，去頂財長蓋特納同聯儲局主席伯南克個位。
任天堂一手要20萬
秋葉原係Baby唯一喺東京最唔想去嘅地方，但又最能感受日本ACG（動漫和電玩）文化同產業嘅偉大。任天堂今年剛好120歲，佢由生產日本傳統撲克起家，○六年推出Wii同NDS Lite，○六/○七年度收入狂飆90%，達9,665億日圓（約753億港元），○七/○八年度收入再升73%，至1.67萬億日圓（約1,304億港元），全年賺2,573億日圓（約200億港元），差唔多係4間港交所（00388）嘅盈利。舊年任天堂股價高見7.32萬日圓（約5,700港元），一手股票要成57萬港紙，依家股價已大幅回落至2.6萬日圓，但買一手仍要20萬港紙。日本上市電玩商今年股價表現不濟，唯一例外嘅係NAMCO BANDAI，微升3.5%。
（Baby）