45%人估有巨浪掩至
恒指始終仲未突破16,000點，上周仲試過跌到14,830點，一周收報15,258點，跌2.2%，連升6周後斷纜。今次《東方產經》網上民意調查問股友，你認為港股短期內會大跌嗎？截至上周末晚上6時，45%人話會有，43.6%人就話唔會。
依家恒指250日平均線喺17,780點，我認為自三月初開始嘅升浪可以用呢條線做目標，都係嗰句，反彈過程會係「急升忽跌」，自己執生。
好似本周三有港股期指結算，周四又有聯儲局議息，美國銀行業壓力測試結果會喺下周公布，照睇有結果前市場又必傳聞多多。上周五道指重上八千點，港股ADR都普遍做好。
恒指喺○七年十月三十日創出31,958點歷史高位，一年光景，去年十月二十七日跌到得番10,676點，跌幅達66%。截至上周收市，半年來恒指已較低位升番43%，係咪代表復甦？總之喺數學上，跌一半後要升一倍先可返家鄉，你自己計吓喇！
中港股市氣氛未回暖
我腳頭差，落親魚缸都係跌市，喺度要多謝各位股友同駐場經理無當我係「掃把星」。你都會感覺到，炒股人數同氣氛真係大不如前，既然中港股市關係密切，我借用內地數據，喺中國證券登記結算網頁搵到，去年十月底深滬兩市「最近一年參與交易A股帳戶數」有5,780萬個，佔所有A股帳戶48.39%，但到今年三月底只有5,228萬個，比例跌到42.01%。
為咗睇真啲，我用Google Trend網頁提供嘅「Search Volume Index」（搜尋量指數），試用香港區嘅網上搜尋情況睇睇股市氣氛。當大家着緊股市，對報價嘅要求自然多，發現喺Google用「報價」做搜尋嘅數量喺去年九月至十月底急升，之後維持下跌趨勢至今。更恐怖嘅係，衰退嘅英文「Recession」由幾乎無人搜尋至去年十月大升，依家仍然高企。
股市之外，人生仲有好多突然。當年捱更抵夜只為聽你講金句，因為記得戰果，更要記得你啲分析，你令我哋知道「講波」同「評述」係有分別，「多謝你！牧師。」
（大健）
香港證券經紀業協會永遠榮譽會長 張天生
後市睇萬八 輪證高危
「下半年會轉趨樂觀，估計恒指可在17,000至18,000點反覆向好，買股票眼光要睇遠啲。股市日日都有得玩，咁貪心做乜呢？好多有錢人唔捨得食，又唔捨得着，有錢都唔見得好開心，我都窮，但我唔會餓死，做人唔好太緊張，有奮鬥心之餘，亦唔好對其他人苛刻。我經常同客講，窩輪、牛熊證、期指風險大，後生仔玩都仲有翻身機會，退休人士同家庭主婦就真係唔好玩啦。」
技術分析專家 梁小鷹
勿估頂測底 順勢操作
「好多股票曾經比高位跌咗九成，我認為唔會再跌落去。其實我已經訓練自己唔再估頂同估底，雖然我命中率高，但其實好危險，搵唔到錢，反而順勢操作更易搵到錢，我依家都有教學生做順勢操作賺錢。」
致富證券上水分行經理 謝志豪
料橫行向好 散戶學精
「去年十月二十七日啲客真係好恐慌，望住部機嘩嘩聲，又唔敢買。可能大家見過大風浪，所以都會炒得更短線，我估後市會橫行向好。其實賺錢機會日日有，唔使太悲觀，做好風險管理最緊要。我自己嘅事業都算係『高位走貨』，所以經常提醒客人止蝕，可互相交流同學習。」