上星期喺97嘅八十幾沽咗一手YEN，原本都有五、六十點執，但可能我太過樂觀，所以冇乘機平倉，結果後來回番轉頭，終於就喺98廿幾先止賺。不過你都唔好話，好彩我平倉咋，唔係就要捱價位，捱價有時都唔係問題，始終都有機會返轉頭，但沽住隻YEN一來蝕息，二來隻YEN好多時，一係唔行，一行就好快，最衰就係行一浸就會停落嚟，幾時跌返轉頭都未知，所以炒YEN如果逆市的話，都要趁早止蝕較為穩陣。
好彩我走得快，因為隻YEN升番去96水平，雖然上星期五收番去97，但如果睇日線圖，美元跌穿咗大約97.65嘅上升軌支持，明顯已經破咗位，隻YEN唔係唔可以沽，但除非美元企穩番條上升軌，唔係美元兌YEN就會繼續喺98.65以下玩上落。
上星期五英國公布第一季GDP，結果經濟收縮幅度擴大，季率跌1.9%，年率仲跌4.1%，不過咁，三月份零售比二月份升0.3%，年率升1.5%，同預期跌0.3%同升1.1%都有一段距離，所以只係見到隻鎊出現短暫沽壓。
由於今次公布嘅GDP都係預估，仲有兩次修訂，所以唔使對隻鎊睇得咁悲觀住，而且小妹認為第一季GDP點都會受到舊年第四季經濟情況影響，過埋第一季之後，第二季經濟應該可以穩定番啲。我見隻鎊唔係好大反應，所以冇平隻鎊，夜晚隻鎊急升，仲破頂上到1.47七十幾，後來見佢穿番1.4750個心理位，先至決定平倉，執番百幾點。
蘇小妹