尋日港股再度做好，雖然成交金額下跌至570億元，但係一些於是次升浪中，走勢較為落後的航空、港口及航運股，尋日都好似趕尾班車咁，齊齊出盡力向上攀升。
不過，表現最好的，定要數內地航空股，皆因內地航空公司就發布，指內地航班出售的機票價格將全面上漲，消息一出，令一直處於困境的航空股，都似乎有望伺機翻生，故即使同時間有消息傳，三大內地航空公司申請政府再注資將會落空，似乎都無礙升勢，當中就以東航（00670）升幅最高，全日升16.9%，收報1.45元，而南航（01055）亦升逾14%，相信航空股今日仍會有一番炒作。
另外，石化股亦都係帶動尋日內地股市做好的功臣之一，皆因除咗上海石化（00338）公布今年首季經營表現優於預期外，亦因為發改委副主任張曉強表示，未來油價的限價將根據國際油價調整，故令市場憧憬成品油有再加價可能。之不過，市場上有人歡喜有人愁，內房股就真係如之前預期般回落，而各地亦開始紛紛討論購房消費券的成效添。
（小尾）