本文重點
上市公司○八年度業績大虧損或盈利大倒退好常見，好多高層好識做，自動減人工兼放棄花紅，實行與股東共度時艱。
僅何超瓊照收花紅
絲絲尋日睇信德集團（00242）嘅年報，見到佢哋都好自覺減人工，但花紅方面就有啲得意，8名執行董事中，唯獨何超瓊仲有50萬元花紅袋，雖然金額唔算大，之不過信德舊年盈利都跌九成，點解佢有花紅收，絲絲唔係好明。
信德有8位執行董事，何超瓊就有50.4萬元花紅，雖然較○七年嘅355萬花紅已縮水超過八成，但對比其他執董就好「突出」，佢嘅總酬金約有956萬元，對上一年就收1,200萬元。
以整體薪酬睇，執董中只有賭王何鴻燊收入保持不變，有6.5萬元，皆因佢同以往一樣，淨係收6.5萬元袍金，冇薪金亦冇花紅，所以唔使減薪，又唔使減花紅。其餘7位執董舊年整體薪酬都要減，大部分係減4%至6%，何超鳳嘅總酬金有557萬元，對上一年收593萬元，相差唔算好大。
余絲韻