本文重點
有好多公司為咗吸引客人，鍾意搵名人做代言人，近期重慶一間房地產就搵咗「鋼琴王子」李雲迪做樓盤代言人，絲絲好奇怪鋼琴同樓盤有乜關係，翻查之下，原來李雲迪喺重慶出世，今次佢就衣錦還鄉，返老家簽約做「重慶天地」嘅代言人，地產商送咗一間逾1,300呎嘅豪宅畀佢。
返鄉下獲贈豪宅
今次「鋼琴王子」返家鄉簽約，半個鐘就袋走幾百萬元嘅代言人費及一間豪宅。聽聞呢間豪宅喺頂層，面積130平方米，仲有江河景，每平方米要成2萬元人民幣，即係價值260萬元人民幣。
喺尋日嘅簽約儀式會，有唔少家長帶小朋友到場，一心諗住欣賞李雲迪即場演奏，點知「鋼琴王子」只係做抽獎嘉賓，派自己嘅簽名CD，搞到好多「小粉絲」失望而回。原來經理人公司有嚴格規定，今次簽約儀式上唔可以彈奏鋼琴，原因好簡單，喺公眾場合彈琴屬於演出，演出就要另外收費。
余絲韻