本文重點
時間過得真快，舊年先慶祝完喺中國扎根150年嘅渣打集團（02888），今年繼續有馬拉松式慶祝活動，講緊嘅仲要係慶祝對集團盈利貢獻最大嘅香港市場150歲大壽，尋日已舉行咗頭炮嘅傳媒聚餐，密鑼緊鼓嘅慶祝活動陸續有嚟，生日正日係七月十九日。
洪丕正珍藏唐老鴨錢罌
等絲絲考吓大家對渣打香港嘅風光史有幾熟悉先，渣打係本港第一間發鈔嘅銀行，咁你知唔知佢哋邊一年開始發鈔呢？咁又知唔知佢哋英文名邊一年開始由「The Chartered Bank」，改咗叫依家無人不曉嘅「The Standard Chartered Bank」呢？
答案分別就係一八六二年同埋一九八五年啦！就算唔識以上兩條歷史題，絲絲估大家有樣嘢一定識，就係喺開戶嘅時候渣打送畀大家嘅一系列迪士尼錢罌，年代最久遠要算係曾經喺博物館展覽過嘅唐老鴨錢罌，渣打香港行政總裁洪丕正（Ben）話佢都有呢個錢罌㗎，大家可想而知阿Ben嘅「歷史」都有番咁上下！
嚟緊嘅慶祝活動未知會唔會有高層飛過嚟，但尋日嘅午宴已經猛人雲集，包括有阿Ben及渣打香港執行董事及亞洲區財務總監馮隆春（Julian）等，佢哋喺渣打都做咗差唔多廿年啦，阿Ben仲笑Julian喺度做咗咁耐都唔識講廣東話添！
余絲韻