港股尋日跌唔落，不過萬六點關唔易破，加上成交額縮水至571億元，再上升似乎唔多夠力。二三線股個別發展，落後股仔仍有捧場客，今日古晨吼勵晶太平洋（00575），呢隻都算係落後資源股。
勵晶業務包括金屬開採（銅及鋅）、煤炭開採，以及生產煉焦煤，最近在新疆的煤礦勘探許可證更獲延長3年。金屬和煤礦經改良後，預期今年產量將大幅增長，料帶來可觀貢獻。呢個幾月無論銅價及煤價均見回升，唔少資源股已較低位反彈超過五成，勵晶擺明大落後。
勵晶亦較其他資源股有一定優勢，目前手頭持有7.4億元現金，扣埋長短債，仲有淨現金6.8億元，每股單係淨現金已值0.16元，現價0.158元仍有些少折讓。至於其每股資產淨值達0.7元，現價折讓更超過70%，現價唔單止落後，直情係偏低至唔合理。現價買入博炒上0.2元，仍較每股NAV嚴重折讓。
古晨