尋日美元喺東京市早段繼續升，雖然一早英國Rightmove公布嘅四月份樓價數據好轉，但係隻鎊只係抽咗一抽上1.4811就玩完，八點鐘度我見隻鎊做番1.47，再望吓幅5分鐘圖，隻鎊穿咗頸線喺1.4780嘅小雙頂，於是決定追沽，喺1.4775沽咗一手，十一點幾隻鎊跌到1.4707之後企定，而且開始反彈，由於一早波幅已經超過100點，我準備平倉，但又唔想錯失賺錢機會，所以，我擺咗個止賺盤喺1.4725，即係大約由低位反彈當時波幅20%，中就離場，如果真係中咗，好彩都執番50點。
隻歐元仲弱，唔使問都係因為上星期歐洲央行行長「等你謝」，暗示五月份會議可能會宣布實行量化寬鬆貨幣政策，市場開始反映緊呢個因素。呢輪歐元好似又行快咗，即係隻鎊跟番隻歐元行，我諗過好唔好追沽歐元，但諗落都係咪搞，而且歐元又跌穿1.30，尋日東京市個高低位又做得幾靚，1.30先嚟沽貨，分分鐘要捱價位，所以都係放棄咗。
差啲睇漏咗，原來英國星期五公布第一季GDP，市場預期跌幅同對上一季差唔多，睇吓可唔可以幫到隻鎊。
蘇小妹