本文重點
「花旗集團財智星級爭霸戰」轉眼已踏入第三年，今年將會喺嚟緊嘅周末正式展開，有超過4,500名來自153間中學嘅學生參加，人數比去年足足多咗一倍，今年仲增加咗網上工作坊活動同埋互動資訊渠道，活動仲包括研討會及模擬網上股票買賣。花旗希望透過一系列活動，提高中四至中七學生對投資理財概念嘅理解，等佢哋可以喺一個模擬環境下運用學習到嘅技巧。
送贈章晟曼著作
絲絲收到風，今年所有參加花旗舉辦理財活動嘅同學，都可獲得花旗香港區行長章晟曼親自編寫講佢自己經歷嘅書，書名為《先站住，再站高》。聽個書名，畀人覺得好穩穩陣陣，其實呢六個字原來大有來頭。
話說九五年嗰陣，章晟曼被邀請「轉會」去世界銀行出任副行長兼秘書長，就喺離開中國財政部之前，嗰時嘅財政部長劉仲藜帶佢去中南海見當時主管中國經濟工作嘅國務院副總理朱鎔基，對話中最令章晟曼刻骨銘心嘅就係呢句「先站住，再站高」。
余絲韻