早前發改委曾經解釋成品油訂價機制的調價規律，就係只要國際油價連續20日平均漲幅或跌幅逾4%，便會考慮調整成品油價，因此尋日內地就再傳成品油價格將再次被調高，而相關股份都乘勢炒上。不過，乘勢炒上的仲有一眾消費股，皆因尋日內地傳出，國家新經濟刺激方案將偏重消費方面，故消費股如中國七星購物（00245）及茂業（00848），就分別上升50.91%及13%。
其實，至今中央都冇親口證實過，是否將有新的刺激經濟方案推出，更遑論係偏重邊一方面，所以計小尾話，想跟入都真係要小心啲，就算走一轉行動亦都要快。
另外，在現今經濟環境底下，內地地產商為逆市求存，所用方法真係層出不窮，最近就有指萬科廣州限價房就將售價調整至每平方米5,000元人民幣，而杭州一樓盤更以7.6折賣樓添，難怪早前內地公布三月份70個大中城市房屋銷售價格都較去年同期下降1.3%，相信「優惠百出」將令內房股股價再度受壓，要留意啦！
（小尾）