本文重點
真係講都冇人信！已申請破產保護及清盤兼欠下過千億美元負債嘅雷曼兄弟，原來公司資產內竟然有可以用嚟做核彈嘅重金屬鈾，數量仲多達50萬磅，差少少就夠整一個核彈，又或者畀核子反應爐用成年。雷曼行政總裁Bryan Marsal話係透過一個商品合約收集呢批鈾，仲話會等市場價錢好嘅時候出貨套現。
市值1.56億等沽貨
市場人士話現時正積極賣資產還債嘅雷曼兄弟，佢哋呢批50萬磅嘅鈾家陣儲存喺加拿大及法國等地，若以市價每磅40美元計，全數沽出可套現2,000萬美元（約1.56億港元），對於欠下超過2,000億美元無抵押負債嘅雷曼嚟講，只係杯水車薪。
有人會問點解貴為投資銀行大行嘅雷曼連鈾生意都做埋，其實雷曼一向都喺商品市場好活躍，有做金屬以至碳排放嘅買賣，最特別係雷曼去年九月出事前一個月，先取得受政府嚴格監管嘅鈾買賣牌照。
不過，雷曼若要批鈾賣得好價錢相信要再等一會，因為喺金融海嘯下，中國及印度等大國都話會放慢核能發電項目，鈾價由去年十二月嘅每磅55美元，連跌5個月至近期嘅40美元，依家雷曼放風話賣呢批鈾，估計鈾價想反彈都難，情形就好似國基會話沽金，金價就即刻㩒咗落嚟。
余絲韻