本文重點
舊年煤價升得勁，令電企叫苦連天，華電國際（01071）錄得首次虧損，蝕咗成25億「人仔」。作為管理層對虧損當然責無旁貸，董事總經理陳建華喺業績會上話，知道股東同投資者損失唔少，同佢哋講聲「對不起」，仲承諾今年會更努力。
今年努力追業績
去年多間公司錄得虧損，有啲係炒燶投資產品，有啲係環境唔好，華電就係因為煤價狂升，令到經營費飆升，蝕到市場都跌晒眼鏡。
陳建華向傳媒講解業績後，忍唔住有感而發話，近年發電企業面對困境，雖然管理層已經好努力，但都係錄得大額虧損，作為總經理自己內心非常慚愧，對於股東及投資者效益帶來嘅影響，佢要同投資者講聲對唔住。
唉！華電蝕咗咁多，投資者個心梗係痛啦，所以道完歉，陳董就即刻派定心丸，話相信困難只係暫時性，相信長遠而言，電力始終係國家經濟發展基礎，前景仲係好明朗，仲承諾未來一年會付出更大努力，提升股東效益添。
余絲韻