本文重點
中信泰富（00267）炒燶外匯，榮智健及范鴻齡雙雙落台，尋日公司出咗年報，顯示兩位前任主席及董事總經理嘅薪酬大縮水。榮智健去年都唔使倒貼，年薪「只係」減少94%，由6,699萬減到348萬元；范鴻齡年薪亦縮水94個巴仙，得番360萬元。其他董事人工基本上都大減，唔知小股東條氣會唔會順番少少？
中信泰富炒燶外匯咁大劑，大家估吓喺「出事」後，審核委員會開咗幾多次特別會議？根據中信年報，由「爆鑊」至去年底，審核委員會總共就外匯合約有關事項舉行咗5次特別會議。
中信泰富每月檢討財況
咁經過教訓後嘅中信泰富點樣避免歷史重演？中信年報話，董事會舊年十月成立資產負債管理委員會，每月檢討公司財務狀況同訂立財務風險管理政策，截至去年底委員會總共舉行過3次正式會議。
另外，睇番由母公司「空降」做主席嘅常振明，原來去年只係出席過一次董事會，怕且都係「出事」後開嘅董事會咯。
余絲韻