本文重點
柯總柯清輝即將離任恒生（00011）副董事長兼行政總裁一職，連佢不嬲睇重嘅副總經理兼財資業務主管張泰強（洋名Jack）都辭職，話想多啲時間陪屋企人，絲絲即刻諗到係咪因為改朝換代嘅關係，不過聽講真係有咁啱得咁蹺，純粹係時間上容易令人誤解啫。邊個代佢個位？咪就係好熟財資業務嘅馮孝忠囉！
張泰強辭職功成身退
近50歲嘅阿Jack，當年由滙豐銀行調去恒生，唔經唔覺喺恒生差唔多5年，仲早過柯總加入。柯總尋日就透過內部Memo通知大家，阿Jack會做到五月最後一日。柯總對佢決定辭職都好唔捨得，話晒佢都算係恒生嘅功臣，皆因阿Jack因為睇唔通啲I-Bnaker推銷嘅次按產品，同埋嗰啲一大堆英文字母嘅產品，堅持睇唔明嘅產品就唔做，於是恒生就冇「落疊」，成為極少數能夠避過雷曼迷債同埋信貸風波嘅本地銀行。阿Jack負責財資業務把好呢個關，股東都應該多謝佢。
開正佢嗰瓣「冇難度」
阿Jack走咗之後，財資業務就會交畀馮孝忠（Andrew），銜頭係財資及投資業務主管。Andrew依家睇開保險同埋投資，六月一日上任後，佢就會將保險呢瓣交畀個人理財及財富業務總經理梁永祥睇。Andrew做過好多家銀行嘅財資業務，新任命唔會難倒佢。
余絲韻