周一雖然歐洲冇市，但匯市一樣精彩，雖然我手鎊喺1.47三十幾止賺，但夜晚見佢跌穿1.47，落到1.46六十幾，多過全日波幅嘅50%調整目標些少，當我考慮緊係咪要即刻入市揸鎊時，佢已經開始升番，即時反應係唔等得喇，但已經要揸1.4678，一陣鎊已經上番1.47，之後一路上到1.47五十幾六十先至開始反覆。
後來見隻鎊由1.47六十幾急升到近1.48，之後企喺1.47九十幾徘徊，個樣真係似突破，最後鎊升穿1.48，我喺1.4812揸咗一手，不過見佢挾上1.4850個心理位唔係好升，於是平倉。Ivey打電話嚟問我點睇隻鎊，我話夜麻麻先至破頂，第二日應該仲有得升，佢話咁就大件事，因為佢個朋友阿Wing原本一路揸住隻鎊，但唔知點解1.48十幾平晒啲英鎊好倉，仲要同時反手沽。後來聽講尋日佢已經喺1.48七十幾止蝕，尋日我見隻鎊好似跌唔穿1.48，所以就喺1.4843揸番，下晝見佢衝穿1.49，於是喺1.4906平倉，之後喺1.4863又揸番，我諗今個星期會破1.50，度吓位，甚至可以試1.54同1.57。
蘇小妹