本文重點
北韓射咗支火箭上天空（唔係太空），諸國震怒。Baby前年去過北韓開城（Kaesong）工業區參觀，雖然係外國投資者及傳媒官式訪問，但一跨過南北分界線，所有手機要被沒收；喺北韓，普通不過嘅便利店FamilyMart亦變得唔普通，店內貨品種類及價錢跟南韓一樣，但只接受美鈔，離境時相機和照片都要經北韓關員過目。
據美國中央情報局世界年鑑，經購買力平價（PPP）後，北韓去年國內生產總值400億美元，全球排名第96，人均產值1,700美元，排名第192，但北韓政府並無公布可靠嘅經濟數據，以上數字純屬靠估。
美相關ETF跑贏大市
美國基金公司USA Mutuals喺○二年推出一隻「邪惡基金」（Vice Fund，美國上市編號：VICEX），主力投資各地航天及國防（負面啲講即係軍火）、賭博、煙草及酒精股，股價喺5年間翻了逾1.5倍，但○七年十月後表現不濟，現價比高位跌咗一半，同期標普500指數下跌約45%，邪不能勝正乎？翻查基金持股，其中一隻軍火股係Lockheed Martin（美國上市編號：LMT），LMT有做導彈同導彈防衞系統。
如果要投資單一國防概念，有美國上市嘅PowerShares航天及國防交易所買賣基金（美國上市編號：PPA），呢隻ETF追蹤SPADE國防指數（DXS）表現，指數成分股包含逾50家國防、國安及太空相關企業，DXS喺○○至○八年每年回報均跑贏標普500指數。
香港就有隻航天控股（00031），但佢嘅業務同航天科技沾不上邊，主要做液晶顯示器和物業投資等，但唔知點解「神七」升空，佢又跟住升喎！
（Baby）