港股休市期間，美國同內地股市照常營業，道指重上8,000點，上證綜合指數亦再次收復2,500點水平。睇番港股，恒指上周收報14,901點，一周升2.48%，連升5個星期。
上次提及「Dark Matter」（暗黑物質）時話好多事唔可以睇表面，好似凱基證券北角分行經理呂焯洪同我講，股友都鍾意低位買貨，近排港股上試15,000點，股友反而少咗買貨，經紀生意都受影響。
60%股民估仍處熊市
股友霍生話：「股票如衣服，早前恒指升穿15,000點時，趁機會買『平衫』着，可惜最後都要蝕本價沽，所以嚟緊幾日會換過件衫着。依家市況唔會再天長地久持有股票。」佢仲話嚟緊四月至五月恒指或回落到12,000點。
我上次話股市好多Dark Matter，小心升市只係熊市反彈，「大鱷」索羅斯同「末日博士」麥嘉華都有類似睇法，呼籲大家小心。我估今次反彈唔止升到15,800點，隨時挑戰18,000點，但近排經常「急升忽跌」，需要千萬個小心。今次《東方產經》網上民意調查問股友，係咪認為港股已踏入牛市？截至上周末下午6時數據，結果28.7%人認為港股已踏入牛市，近60%人認為仍然處於熊市，其餘就話唔知道。
對於大部分香港人，復活節最大意義係長假期，但日子年年唔同係有啲難記。記住每年春分月圓後第一個星期日就係復活節，仲必定係每年三月二十二日至四月二十五日之間。因為春分後開始日長夜短，有光明戰勝黑暗嘅意思，代表耶穌復活，而耶穌受難節就係復活節前嗰個星期五。
自製「藍籌痛苦指數」
講到受難，股友過去一年何嘗唔係？一身蟹貨仲未鬆縛。我抄量度經濟情況嘅「痛苦指數」，自家製作咗一個「藍籌痛苦指數」，趁藍籌股已經公布業績，計一計邊隻係「藍籌最痛」，睇睇股友有幾痛苦。
「痛苦指數」（Misery Index）係通脹率加埋失業率，由經濟學家Arthur Okun喺六十年代擔任美國總統經濟顧問時發明，量化經濟不景氣對人民生活嘅影響。據《The US Misery Index》網站資料，目前美國痛苦指數係8.34%，有紀錄以嚟最痛係八○年六月嘅21.98%。
我抄呢個方法製作「藍籌痛苦指數」，投資股票兩大回報來源係股價升幅同派息，我利用42隻藍籌股過去一年股價變幅，加上年度每股派息按年變幅得出「藍籌痛苦指數」，指數愈細代表愈痛苦。當然呢個計算方法會有不足之處，但當作嘗試用新角度睇吓股市。
派息紓緩股友傷痛
過去一年「藍籌最痛」係中信泰富（00267），以股價跌幅68.99%加上每股派息按年少咗75%，得分係負143.99分。另外，東亞（00023）同國泰（00293）就排第2同第3位。上周剛完成「世紀供股」嘅滙控（00005）都喺前列位置，以負87.4分排42隻藍籌股之中嘅第6位，股價和年度派息分別跌咗58.36%和29.04%。唔知供股又有無令股友覺得苦上加苦？
吸引我注意嘅反而係幾隻中資銀行股，交行（03328）、工行（01398）、中行（03988）同建行（00939）都喺榜尾附近，雖然股價錄得23%至40%跌幅，但年度派息有所增長，如建行年度派息增加61.48%，交行同中行都多咗約40%，總算有個交代。
「沒有苦，哪覺甜；沒有風，怎知暖」係一句我經常記喺心上嘅歌詞，亦係我遇到逆境時嘅自我鼓勵。
（大健）