上星期四開始復活節長假期，個市好明顯冇晒秩序，隻鎊就更加係有波幅冇升跌幅，原本嗰日下晝見隻鎊彈到上去1.47七十幾，可以平倉食胡，但估唔到佢回得咁快，一陣就跌番去1.47三十幾，其實我都預咗復活節假期在即，個市都唔會有方向，所以應該有胡就食，而且Jenny打嚟問我隻鎊會唔會繼續升時，我都話因為係東京市尾段同倫敦開市時間，應該唔會形成趨勢，但自己又冇走到，結果隻鎊仲跌番落去1.46五、六十。
倫敦開市之後都係反反覆覆，本來諗住擺定個止蝕盤就算數，點知去到紐約午市，美元突然急升，歐元連1.32都穿埋，隻鎊失守1.4650心理位之後仲繼續跌，夜晚跌穿過1.46，我見佢跌得咁急，雖然認定係因為假期前嘅平倉盤搞鬼，但最後我都係決定離場，於是喺1.46四十幾止蝕。
雖然後來佢彈到上去1.4670，但我冇後悔止蝕。因為始終都係長假期，大戶肯定已經離晒場，冇人維持秩序，而且又唔知星期一開市會點，所以先至決定離場。
尋日未到九點就起咗身，見隻鎊又跌番落去，仲跌到1.4607，但之後好快反彈番上去十幾廿幾，雖然時間尚早，但即時醒起，朝早九點前係做反市嘅最佳時機，嗰時好似啱啱過咗九點，所以決定入市喺1.4624揸番，之後隻鎊升番上去1.46六十幾，下晝仲上番1.47，倫敦市早段升到1.4745，我見個高位咁靚，又見佢回番落去1.47三十幾，所以決定平倉。
蘇小妹