上星期四未到1.45就平咗手鎊，諗住佢1.45會頂一頂，隻鎊或者會試番低些少先至再升過，點知隻鎊只係橫行，之後仲爆穿1.45，但我驚佢係假突破，所以冇追，點知佢愈升愈有，仲上到1.46，我見隻鎊喺半個鐘內已經升咗百幾點，點追呀？惟有等吓先啦。
果然，隻鎊企唔穩1.46，仲開始回，後來見佢跌到落去1.45二、三十之後縮番上去，於是喺1.4548揸咗一手，之後隻鎊真係升番上去。
雖然當時歐洲央行仲未公布議息結果，而G20又未有聲明公布，但啲外幣咁樣挾法，惟有照跟啦！但我唔會揸歐元，因為真係唔知，如果歐洲央行減息半厘，之後又宣布實行量化貨幣政策，個市場會有咩反應。
結果歐洲央行只係減息0.25厘，而G20又好似表現得好合作，歐元升到1.34，英鎊破埋1.46同1.47，上星期五見埋1.48，雖然夜晚一路守住1.48，但我唔想過市，最後都喺1.4828止賺。不過，今個星期四英國議息，依家炒緊唔減息，如無意外，隻鎊應該可以輕易破一破1.50先，今日吼位再揸番。
蘇小妹