本文重點
呢排「貪婪巨人」鬧出嘅醜聞，令到美國百姓個個咬牙切齒，估唔到原來佢哋喺香港行家眼中，一樣咁令人側目。圈中老行尊話，巨人旗下嗰間非壽險公司，拉起保險嚟竟然可以瞌埋眼開價，不計成本，目的係搶咗啲大客，谷大條數，兼且爭埋市場排位，搞到同業都搖頭。
亂劈價 同業搖頭
老行尊話，呢間公司嘅市場排位已經係頭幾位，名氣夠大，集團又有國際地位，但係如果唔同佢哋交過手，真係唔知原來佢哋嘅作風咁冒險。好似有個做地產起家嘅本港大富豪，佢哋旗下資產嘅保險費支出好可觀，每年淨係同旗下物業、港口買保險，幾乎已經可以養起一間細保險公司。
巨人第一年不惜工本搶客，老行尊所屬嘅公司落敗；第二年巨人又再蝕本報價，老行尊又再輸咗。經歷咗兩次交手，老行尊甘拜下風，就算呢間地產商正正係老行尊公司嘅股東，佢哋都唔會做違背商業原則嘅事。
呢種搶客手法真係令人搖頭。唔通佢哋高層又係靠谷大業績，博攞巨額花紅？
余絲韻