本文重點
經濟欠佳，唔少人都被公司減薪，就連大家公認嘅「打工皇帝」亦都唔例外。和黃（00013）新公布嘅年報顯示，包括和黃副主席李澤鉅及董事總經理霍建寧在內嘅董事局成員都要減收花紅，令全體董事合共減薪8.3%，而霍大班一人嘅總薪金就減近一成，不過佢嘅人工仍然高達1.33億元。
霍大班少收1500萬
和黃董事減收花紅嘅其中一個原因，係由於和黃未如○七年般透過出售印度業務獲一次過巨額嘅收入，單計霍大班一個人嘅花紅就減少1,500萬元，至1.2億元；至於李澤鉅本人計及在長建所收嘅花紅，佢嘅花紅收入亦減少咗470萬元，至4,230萬元。
但如果以霍大班1,026萬元嘅基本薪酬計，佢基本人工嘅加幅仍達4.5%，單睇呢個數，就足以令唔少普通打工仔感到羨慕。
去年業績交足功課
但話分兩頭講，霍大班佢哋嘅基本薪金喺逆市下仍獲提高，其實亦不無理由。點解？睇番和黃嘅業績，就會發現和黃嘅持續經營業務，去年所獲嘅盈利增長達17%，而備受關注嘅3G業務虧損更減少咗39%。所以以基本業務來講，和黃管理層確係交出一份不錯嘅成績表！
余絲韻