本文重點
《財富》中文版雜誌第五次發布「中國最具影響的商界領袖」榜，喺○八年度，騰訊（00700）主席馬化騰、聯想（00992）行政總裁楊元慶及招行（03968）行長馬蔚華等二十五人榜上有名，呢本雜誌揀人嘅標準係喺行業領先者中能影響企業、產業同埋更廣泛嘅世界傑出管理者。
民企富豪唔願上榜
絲絲突然諗起一件同富豪榜有關嘅嘢，早輪同一位民企老總食飯，佢話好煩，成日都有富豪榜等嘅人搵佢哋做訪問，人怕出名豬怕肥，兼且前車可鑑，出親富豪榜嘅都無乜好下場，所以佢點都唔肯，佢仲聽講有啲富豪朋友認真大手筆，寧願畀幾十萬出嚟叫啲人唔好擺佢個名上榜，究竟係真係假無從考究。
不過，絲絲真係識得一位長期住喺上海嘅外國人，早幾年率先搞個民企富豪榜出嚟，起初佢哋嘅評估方式真係好簡陋，求其喺大學請個大學生Part Time喺網上搜集民企資料，再打電話約嗰間公司訪問，當然通常都約唔成啦。大陸啲有錢人一向好低調，所以啲富豪榜嘅統計方式，其實你同我都可以喺網上搵資料做統計，不過今時唔同往日，可能統計會精準好多，啲較為出名嘅雜誌所搞嘅富豪榜、領袖榜都仍然有佢一定嘅地位同分量。