全球都講緊裁員減薪，或者放無薪假，特別係航空業，國泰（00293）、新加坡航空都先後推出無薪假計劃，削減開支。但係翻開國泰○八年年報，一眾高層人工有增無減，好似主席白紀圖○八年基本薪金有105.9萬元，較○七年多咗24.7萬元，升三成；集團多位非常務董事，董事袍金都加咗唔少。
集團行政總裁湯彥麟仲勁，○八年基本薪金有432萬元，比○七年多咗92.8萬元，但係大家記性好嘅話，湯彥麟其實喺○七年七月上任，只做咗半年行政總裁，所以佢實際可能減咗人工都話唔埋。
經濟轉差，消費當然要審慎，作為非必需品嘅漫畫書當然亦受影響。好似本港知名漫畫家黃振隆（即係大家熟悉嘅黃玉郎），自○四年起向耀萊集團（00970）提供漫畫及卡通設計服務，佢尋日主動向耀萊提出減來年（今年四月至明年三月底年度）人工和花紅，減幅達兩成多，粗略計，一年可以為公司慳番280萬元，可說係共度時艱咁話。