教幼稚園人工幾十萬？
只要有水吹，唔怕冇金句！名人明星出口未必成文，卻令人笑爆嘴！《啜核金句王》每周網羅全城網民熱議的名人明星金句，有讚有彈，嬉笑怒罵，共冶一爐！
吳綺莉
吳綺莉爆卓林與老婆Andi出走後唔肯搵工，Andi自稱當年教幼稚園月入幾十萬港元，只是後來同卓林一齊後有人群恐懼症，不能隨便搵工：
「我好想去Andi那家幼稚園教書，人工好高有幾十萬，有人知道在哪嗎？我想去做。」
花生友：要兜咁大個圈寸人，真係戥你辛苦！
方力申
方力申為好友鄭中基擔任演唱會嘉賓，「神還原」當年《美女廚房》金句「假o架啲奶」，更大爆：
「嗰個（節目）係假o架！」
花生友：係咪要搬志雲大師嗰句「假的真不了……」出嚟呀？
王麗嘉
王敏德女兒王麗嘉出席活動時表示考慮拍全裸寫真，但只會放上網，不會在港推出寫真集，因為：
「覺得有好多鹹濕佬會拎住本書，有啲恐怖。」
花生友：都預咗啦，你睇靚仔流鼻血，嗰時你個心諗緊乜，咪又係一樣！
郭富城
郭富城與懷有身孕的太太方媛情人節出巡Shopping，期間方媛差錯腳險絆倒，城城Man爆同佢講：
「好彩我拖住你咋！」
花生友：其實拖實老婆好正常啫！