吳若希險遭火燒 老公隨時救駕

吳若希(Jinny)被師妹菊梓喬攝位成功,暫失「星夢一姐」地位。她拍攝新歌MV時,要忍受風吹及火烘,相當慘情!幸好她全程有老公Alex愛相隨,相比Dry了多年的菊梓喬,幸福人妻終於攞番個彩。

育有一寶貝女的Jinny,前日星期日放棄家庭樂,到南區石灘拍攝劇集《福爾摩師奶》插曲《暗中愛我》MV。穿白色喱士裙的她,要忍受三米高的火柱撲面,隨時有燒傷危險。見她表現淡定,相反在場陪同的「廿四孝老公」Alex表現超緊張,一見工作人員點火燒太太面前的紅布時,即愈企愈埋,隨時作出英雄救美,要工作人員提醒:「唔好行咁埋,入鏡喇。」他才移開幾步。

暖住好舒服

Jinny透露今次MV玩火是度身訂造:「導演話我性格好惹火嘛!其實係《越難越愛》喺水底拍,而上首歌《日月存亡》喺大帽山拍,好大風,所以今次唔玩水同風,咪玩火囉。」提到現場大風,可擔心被火舌燒傷?她淡定說:「有工作人員睇實,啲火吹向我時,一定會叫我快啲走開,況且有滅火筒做準備,我本身又唔怕熱,只怕凍,天氣咁啱有啲凍凍哋,有個火堆暖住好舒服。最重要係,會提醒工作人員拍完清理現場。」

提到Alex做跟得老公,Jinny直認對方經常陪開工,並自誇抵錫:「我對佢好好o架,講到我成日虐待佢咁。」而Alex表示為了陪太太,吹了一整日風及澗水,凍到鼻水長流。