青雲臣服女拍檔湯怡樂做「小三」

劉青雲、林嘉欣、張家輝和袁詠儀等演出的英皇電影《廉政風雲 煙幕》上映12天，票房已高收26,716,191元，昨日牛一的青雲，得知票房又創新紀錄，可算是最好的生日禮物，其太太郭藹明更相約黃子華等老友為他慶生，氣氛熱鬧。

樂觀面對不快事

而日前青雲到戲院謝票，獲戲迷齊聲說生日快樂，令他大為感動！拍檔嘉欣、袁詠儀、湯怡和吳岱融更為壽星仔送上祝福，眾人希望快點跟他再合作，嘉欣說：「希望佢同太太甜甜蜜蜜，好期待之後同佢繼續合作，套戲成績咁好，好想快啲拍續集，未必一定要做佢太太，做佢細妹、同學、同事乜都得，總之唔係做佢媽咪就得0架喇！」袁詠儀則祝青雲身體健康和事事如意。湯怡更搞笑說：「希望你繼續Keep住咁黑黑實實、咁Cool、咁有威嚴，同埋我想話，我唔再驚你0架喇！」原來她跟青雲合作時甚緊張，更驚到硬食NG！

湯怡坦言對住青雲，感到萬分緊張！	放大圖片	謝票時，一班觀眾齊齊唱生日歌氹壽星仔。

青雲受訪時坦言正日之前已有很多朋友約他食生日飯：「好多好耐冇見嘅朋友送咗五、六個蛋糕畀我，我覺得好Surprise囉！我唔係鍾意慶祝嘅人，比較低調。」嘉欣即忍不住說：「咁慘？」他說：「唔慘！自己低調唔鍾意慶祝啫，但都鍾意同人慶祝嘅！」說到生日願望，他一時感觸說：「希望大家身體健康，笑面迎人，遇到咩人生不如意嘅事，都樂觀面對，因為人生不如意事十常八九，樂觀最重要！」

睇Mon向前輩偷師

此外，飾演調查員的湯怡雖然與青雲僅得一場對手戲，但已心滿意足，並指該片雲集一眾影帝、影后，她會睇Mon偷師。講到若拍續集，她即嚷着想與青雲有感情線：「戲入面青雲同嘉欣好番，都可以有第三者0架嘛，我一廂情願鍾意啫！（之前你話應該同陳家樂發展感情線，唔驚同佢傳緋聞？）唔怕，我識佢咁多年，上年同佢拍咗三套戲，係再熟落啲！不過要過電就一早過咗啦！（家樂同青雲揀一個呢？）唔使諗，一定係青雲。」