黎諾懿棄做虎爸 音波功教小春雞
每當家中增添新成員，必會掀起連番湊B樂與怒，本報搵來圈中多位星級爸媽逢星期日炮製全新專欄《家有B事》，與讀者們分享育兒心得，頭炮請來無綫藝人黎諾懿與其寶貝囝囝黎峰睿（小春雞）父子兵上陣，萌爆全城。
去年在無綫劇集《BB來了》飾演新手爸爸的黎諾懿，現實生活亦如劇中角色，太太李潔瑩在2017年為他誕下囝囝小春雞後，他即由愛與朋友摸酒杯底的「浪子」變為宅在家中的住家男，完全懶理朋輩風花雪月，有仔萬事足！
每次提起育兒生活，黎諾懿都眉開眼笑，早有一套湊B大計的他，不會採用嚴父出孝子的方式，相反會「扮演好人」氹囝囝，他說：「阿仔好怕我唔開心嘅表情，我會話佢一句，然後用眼神同音波功去煩佢，話畀佢知NoNo，咁樣係唔啱嘅！小朋友一定經歷曳嘅階段，我細個都曳，所以會縱容佢有少少曳嘅！」
浪子變宅男
自當爸後，黎諾懿坦言生活有很大改變：「以前我會同朋友出去傾吓偈、飲杯嘢，但峰峰愈來愈大，出街呢個動作就變得愈嚟愈少，我想用多啲時間陪住佢成長，見證佢好多嘅第一次，一次都唔想錯過。」
3招對付扭計B
BB扭計最令人心煩，黎諾懿分享三式育兒小貼士，醒醒各位新手爸媽！
* 切忌急躁發脾氣
* 以身作則先收聲
* 專注眼神作懾服
《家有B事》每集請來圈中不同的模範爸媽，包括藝人黎諾懿、郭羨妮、李漫芬、莫家淦、陳爽、張慧儀、周家蔚、名模Ana R.及拍賣官金鈴等，齊齊分享照顧子女的趣事及開心Share萌B照。