吳卓羲恨做花仔黃宗澤變身花車
藝人黃宗澤（Bosco）和吳卓羲昨晚現身煞科宴，有指好友林峯趁飯敍宣布婚訊，當日在場的卓羲雖代為否認，但不忘搞笑指好友若結婚，想自薦做花仔，Bosco就話想做花車，認真抵死！
Bosco、吳卓羲、苗僑偉、馬德鐘、苟芸慧（苟姑娘）、黎燕珊、張曦雯和譚凱琪等昨晚出席邵氏網劇《飛虎之雷霆極戰》煞科宴，有腳傷在身的Bosco要撐拐杖，透露還有一日大場面要拍攝，由於行動不便，故會用替身，笑言坐輪椅扮打、扮走都好考演技，絕不容易。
馬德鐘想變奸
有指老友林峯早前與好友聚會時宣布喜訊，吳卓羲說：「佢冇同我講，當日係賀梁競徽拎獎，阿峯都冇講婚事，一係就收得好埋冇同我哋講。（將來佢結婚做兄弟？）我想做花仔。（阿峯同女友感情穩定？）唔知，呢啲等佢哋自己發揮，佢都冇咩點講，不過都有見過佢女友。」更指大年初一將與姚子羚飛加拿大登台，問到會否獻唱經典歌《別怪他》？他笑說：「到時上飛機先練，未決定唱咩歌，應該係唱賀年歌。」Bosco則抵死表示將來阿峯結婚，他想當花車。問到農曆新年會否出埠？他說：「約咗物理治療師，咁嘅身世唔通去打籃球同踢波咩！」
至於未拍過《飛虎》系列的馬德鐘，表示當過真正「飛虎」，問到可有興趣拍第三集？他說：「想就梗係想，但自薦都冇用，要合適先得！我仲想演反派，好玩好多！」
苟芸慧鬧老公
苟姑娘就與老公陸漢洋恩愛現身，她透露劇中演馬國明老婆，性格潑辣，經常鬧老公，故拍攝期間不時搵老公練習，陸漢洋即賣口乖：「無論佢做咩角色，都有可愛一面！佢角色唔算潑辣，只係女中豪傑啫！」問到奶奶可有催生B？她指交由老公話事，陸漢洋笑言：「之前話咗生老虎仔，唔係我一個話晒事，係有份參與啫。」