Aka@SG中流感病到亂噏
組合Super Girls（SG）昨日三缺二為火鍋店擔任剪綵嘉賓，成員Yanny身在馬來西亞拍戲，而隊長Aka則不幸確診甲型流感，要留家自我隔離！她們指Aka「中招」前、上星期五她們才一起工作，當日對方已經失聲：「佢好乖全日都有戴口罩，係依家都仲沙聲，但精神都OK，有叫佢多啲休息。」
對於Aka於IG出Post與妹妹交代身後事，預先指定遺照及扶靈名單，SG聞言勁大反應：「啋！話佢亂講嘢，佢好唔舒服先咁講，新年流流咁樣唔吉利！」成員Jessica亦自爆媽媽都「中招」，自己即時被下禁歸令：「佢誇張到唔畀我返屋企瞓。（最後有返屋企？）有返，媽咪搵消毒藥水洗晒全屋，驚好嚴重傳染得好快。」同場旅遊達人黎學勤冧爆指同女友有結婚計劃，又謂新年會互相去屋企拜年。