澳洲自駕遊超速 丁子朗被越洋追數

丁子朗自言不愛揸快車，今次被罰千八蚊會銘記在心。

返港後的他，竟然收到澳洲寄來的超速罰款單，大感無奈說：「因為嗰次係自駕遊，冇諗過期間被影『快相』，依家收到租車公司寄嚟嘅罰款。（罰幾多錢？）千八蚊呀，好肉赤。」他坦言不是第一次自駕遊，但超速被罰則是首次。

他自言平日駕車相當小心，亦不是愛開快車之人，他說：「今次真係自己做錯事超咗速，因為嗰度路面好闊，唔覺意揸快咗啲啲，當時完全唔知，因為隔籬啲車同我差唔多速度，我又冇特別超前佢哋，直至返到香港先有單寄嚟，下次時速100就100，超少少都唔得。我聽澳洲朋友講，唔覺意超多3km已經可以抄牌。」他提醒自己在外地駕車時要注意路牌和車速，不會再犯同樣的錯誤。

千八蚊嗌肉赤

雖然去旅行預了花費，卻想不到有筆額外支出，他說：「雖然千八蚊係好肉赤，但都OK，接受到，當買個教訓警惕，依家將我嘅大意用錢嚟作賠償，都好彩，起碼冇造成任何交通意外。」並透露已交罰款：「我惟有過數畀澳洲嘅朋友，由佢幫我交罰款囉。」

子朗愛陽光與海灘，不時大晒出遊照。

丁子朗去年12月飛墨爾本過熱辣辣聖誕。