李彩華做電燈膽霸住黃嘉樂女友
藝人李彩華（Rain）近年頻頻賺人仔，難得近日放假返香港，即相約好友黃嘉樂及其攝影師女友Samantha在大坑開餐，Rain懶理做「電燈膽」全程孖住Samantha「Girls Talk」，被冷落的嘉樂不敢插嘴只好做旁聽！
近年長駐內地拍劇吸金的李彩華，去年初與拍拖三年的「新五虎」成員何遠恒分手後，感情至今未有着落。事業得意的她，雖然愛情Dry爆，仍不愁寂寞，不時做孝順女陪父母周遊列國，又相約朋友出海耍樂晒Fit爆身材！
歎完雞煲唔夠喉
近日放假返港的Rain，相約攝影師好友Samantha於大坑歎雞煲，兩人有傾有講，醫肚後意猶未盡，到附近餐廳靜靜地飲嘢繼續Girls Talk，未幾見戴住Cap帽的黃嘉樂前來會合。席間見兩女齊齊研究手機上的內容，Rain還托住下巴專心聆聽，一時又講到嘴嘟嘟，表情多多，而同場的嘉樂只好翹埋雙手乖乖旁聽。
素顏上陣Say Hi
期間發現有記者拍照，他們亦友善揮手打招呼，素顏上陣的Rain急急塗唇膏補色扮靚。三人傾至凌晨12時才捨得埋單離開，嘉樂拖住女友往停車場取車，而「電燈膽」Rain則獨自駕車返歸。
