陳煒康華空中瑜伽驚髀罅筋撕裂

陳煒（左起）、鄭希怡及康華寓工作於娛樂，約埋玩瑜伽。

陳煒和康華於無綫新劇《法證先鋒IV》是賓主關係，現實中分屬好姊妹，演Madam Queen的陳煒日前與康華和Yumiko約埋練習瑜伽，互相提點，甚有默契，當中以陳煒做得最有板有眼，教練亦讚她快上手。事前只練過一次的她，今次掌握到多些姿勢，不過因大腿有傷患，未能發揮得淋漓盡致：「十幾年前為亞視台慶練一啲好似馬戲團嘅表演動作，不慎拉傷大髀內側，條筋撕裂，事隔咁耐，條筋縮短咗，不過空中瑜伽講求手力，出嚟美感好好，今次角色需要，咪速成咁練囉，當做吓運動啦！」

衰心急冇熱身

康華的角色有少許笨拙，常要陳煒提點，她練習時同樣未敢太劇烈拉筋：「以前跳舞成日拉筋，曾經拉斷過筋，所以今次唔敢做太劇烈嘅動作！（筋都拉斷？）當年跳舞，成日會將腳擺去頭側邊，有次心急冇熱身，條筋就撕裂，好痛o架！今次為個劇練瑜伽有啲冒險，但動作好靚，付出都值得！」

夠時間陪女

至於Yumiko指瑜伽戲份讓她發揮貪玩本色，更在瑜伽帶上盪鞦韆：「未做過空中瑜伽，原來呢個運動係唔畀傾偈，文靜嘅嘢唔啱我，哈哈！平時我有做運動，每星期兩次泰拳，不過有機會接觸都好，之前條頸有啲唔舒服，練完都鬆咗啲！唔太難上手，又有女性美感，今次因為拍劇練習，工作中輕鬆吓幾好！」飾演專業品酒師的她，已有十年沒正式參演無綫劇：「繼客串《溏心風暴3》之後，正式演一個角色已相隔十年，睇到台前幕後嘅進步，好似拍電影咁認真。（習慣再拍劇？）囡囡依家三歲，唔想錯過佢成長階段，我又未必再生，喺TVB拍劇都好錫我，只係有幾日較長時間，都夠時間陪女！」

陳煒做瑜伽基本動作熱身。	陳煒因大腿有傷患，未能盡情發揮。	曾經拉斷過筋的康華，未敢做劇烈動作。
鄭希怡揚言空中瑜伽唔難上手，仲擺埋甫士影相。