拍MV唔吼吳業坤 Aka：我有要求！

組合Super Girls隊長Aka昨日到電台宣傳單飛歌曲《你在聽嗎？》，問到為何不邀緋聞男友吳業坤拍MV？她笑說：「要跳舞o架嘛！MV搵咗個外國型男嚟拍，真係好靚仔，係我識咗好多年嘅朋友，不過我唔鍾意靚仔。（你鍾意宅男？戴眼鏡嗰啲？）唔係o架！我有要求，想男仔有少少肌肉，證明生活、飲食有規律。（坤坤呢排成日操。）我冇留意呀！」她又透露2月12日會在音樂餐廳與歌迷舉行生日會，屆時會唱歌，是她首次Mini Live，問可會請坤坤？她說：「太Mini喇！等大啲嘅場地先請多啲朋友嚟，我都希望請到偶像容祖兒睇我喺大場地開騷，唔想失禮佢。」