陳豪囡囡戴罩防流感萌爆Say Hi

陳豪搭住太太Aimee膊頭晒恩愛，但都不及囡囡Camilla精靈搶鏡。

近日多間幼稚園因流感爆發宣布停課，圈中亦有不少藝人中招，育有兩子一女的陳豪和陳茵媺，當然要做足預防措施抗流感！

前日下午3時許，兩公婆帶住2歲大的細女Camilla現身中環皇后大道中街頭，三人齊齊戴上口罩，當日天氣不算冷，陳豪僅穿上短袖Tee及短褲，而囡囡則以間條背心上陣，甚有夏日氣息，只有抱住囡囡的Aimee穿長袖衫及毛毛短靴。等過紅綠燈時，陳豪發現記者在場，即手指指告知老婆，Aimee即教囡囡向鏡頭揮手，雖然Camilla看不見記者方向，但都聽話揮手，相當乖巧，其後他們步往附近大廈停車場取車離開。

加穿羽絨背心的陳豪單拖行超市。

陳豪排隊付款期間猛講電話，似乎是與太太相約地點會合。

左騰右騰買壽司

約傍晚6時半，一家三口又現身西九龍一個商場的超市購物，原本僅穿短袖Tee的陳豪，換了輕便波鞋再加穿羽絨背心保暖，見他在雪櫃前左騰右騰揀壽司，而Aimee則在附近閒逛，陳豪挑選了幾盒三文魚壽司，即往排隊付款。問到農曆新年會否舉家出埠？他說：「唔會！留喺香港帶小朋友去拜年。（新年有冇送禮物畀小朋友？）冇，佢哋已經有好多禮物，唔想佢哋咁着重物質。」買完壽司，他才會合老婆和囡囡。