馬國明呆賀女友黃心穎跪玻璃見紅
黃心穎今日踏入30歲，前晚她與男友馬國明及一班圈中好友搞校服派對，更冧爆指男友送了既Sweet又特別的禮物，期間忘形到跪玻璃「見紅」都唔知！
藝人黃心穎與男友馬國明、好友莊思明、高海寧、湯洛雯、岑杏賢、張振朗等，在網上訂購校服，齊齊在派對上着，心穎受訪時說：「上次我哋同高Ling慶祝生日，跟住諗咗呢個主題，都要多謝湯洛雯，係佢有心思幫我搞，大家一致着校服好Cute，如果大家以前真係一齊讀書應該幾好玩，有咁多校花校草！」問男友馬國明送了甚麼，她冧爆說：「送咗好滿意嘅嘢，係特別、Sweet嘅，不過係秘密。」
喪流血唔識痛
不過全場最Cute的並非一班靚女，而是出名「天然呆」的馬國明，身穿紅色冷衫的他個樣Keep住呆，他笑說：「我只係參與，都係到此一遊，點都好，祝佢30歲生日快樂。」
不過派對發生小插曲，心穎跪低切蛋糕時被玻璃碎割傷膝頭，當場見紅，她說：「大家唱完生日歌，我就切蛋糕，起身時佢哋見我成個膝頭都係血，原來地下有玻璃碎，我當時Feel唔到痛，但傷口不停流血，我講笑話願望係現場嘅人今年大紅大紫，估唔到真係兌現，見紅好意頭！」
有份到賀的高Ling揚言玩得好開心：「我哋帶咗好多道具，好似眼鏡、糖咁，仲影咗好耐相，成七百幾張！」而思明笑言等過相都等了45分鐘。
