張達明為仔女抗癌：陪得一日得一日
藝人張達明日前接受東網巨星節目訪問，透露於新片以病人身份演繹病人。身為抗癌勇士的他表示：「影我條頸嘅皺紋係冇化妝嘅，真係皺晒，我攞嘢都係『Kick住』，如果開飯揸筷子拍戲，我做唔到(口架)，夾唔到嘢，只可以用叉食。」雖然健康欠佳，但他很想以這個身體狀態演活角色，故拍攝時很投入，並幽默說：「又可以賺少少工資，係鼓勵。」
冇絕對解決方法
他又分享抗癌經過：「唔係普通感冒、咳喎、流鼻涕喎，有咩所謂。我呢啲係重症，係癌症，整個過程好艱巨，屋企人關心好緊要。嗰時冇工作做，每日24小時好無聊。」治療過程後，他出現罕見的後遺症：「就係中咗鉑金毒，全身神經線受影響，好大困擾，郁唔到，咁多年都解決唔到，做咗好多運動針灸，各式各樣治療，廿幾種，都冇一個絕對解決方法。」
他直言抗癌過程非常恐怖，但自覺是幸運兒：「好彩我有仔女，如果自己一個人係好危險，冇顧慮，冇嘢要承擔，好容易就冇！無論幾咁痛苦辛苦，諗起我仔女就一定要堅持落去，陪得一日都係一日嘅快樂。」
周潤發鼓勵跑步
張達明慶幸兩位好朋友一直支持，一個是吳鎮宇，經常帶他看不同醫生；另一個是周潤發，鼓勵他跑步：「唔係簡單跑，而係慢跑。好認真，朝早6點半跑，一般人叫我唔做o架 ，咁早起身。」