宣萱領養癌犬餵靈芝補身
藝人宣萱昨日帶同3位「寶貝」出席人狗百萬行活動，透露其中7歲的Lok Lok剛領養2個月，帶返屋企前進行身體檢查發現有嚴重Cancer，及時做手術後情況穩定，現時會餵食靈芝及綠茶進補，每月花費約千元。問到可會再領養更多毛孩？她耍手擰頭說：「頂磅啦！以前最多6隻，太多唔公平又會分散注意力。」
講到左腳拗柴傷勢，她表示有睇醫生做物理治療，希望盡快復原開工︰「依家紮住咗，但郁到，係除鞋會見到少少腫。」又透露將與老友古天樂開拍《尋秦記》電影版再續前緣，問到可有恭喜對方歌、影、視大滿貫？她大笑爆料：「有呀！佢話要唱歌畀我聽！約咗成班朋友同佢慶祝，仲話我哋鍾意畀人虐待。（會拍片？）私下分享啦！係幾開心嘅！（支持佢唱番歌？）唔支持，因為知唱歌唔係佢首選，玩吓就OK。」
同場莫可欣帶同10歲囡囡及兩隻愛犬現身，表示老公方中信正與周潤發於澳門拍戲，並透露電影題材跟跑步有關，寓工作於娛樂：「佢都跟咗發哥跑咗年幾，由一開始跟唔上喺山度爆晒粗，依家就快過好多人，同埋瘦咗又弗咗。」