苟芸慧恨生B焗陸漢洋學做老竇
藝人苟芸慧（苟姑娘）一直很喜歡小孩，曾揚言要生四個，等天賜Baby之前，首要任務先是輔導尚未Ready做爸爸的陸漢洋，苟姑娘助養小孩，又經常帶姪兒回家幫老公實習。
現年35歲的苟姑娘去年十月下嫁賽車手陸漢洋，人妻三個月試用期即將屆滿，她很喜歡小朋友，好想做媽咪，但偏偏陸漢洋未Ready做爸爸：「佢係屋企嘅King，識佢嘅人都知道佢以前唔鍾意結婚，唔想生小朋友，佢已經有進步（結咗婚），所有嘢要講啱Timing，先係Right Timing，希望朝住Positive方向，一步一步嚟。（你好似社工？）自己係鍾意小朋友嘅人，想知道做媽咪係點，身邊啲朋友都做咗媽咪，自己好羨慕，希望有自己小朋友。其實陸生個性都似小朋友，希望佢可以快啲成長啦！」
驚子女成負累
原來陸漢洋未Ready的主因是覺得自己好曳，擔心將來小朋友似自己，成為社會負累。苟姑娘為加速老公成長，半年前兩人開始助養來自柬埔寨和斯里蘭卡的兒童，現時共助養了兩男兩女，嘗試透過助養讓老公跟小朋友作初步隔空接觸，她說：「我哋嘅『兩子兩女』會定期寫信畀我哋，好似個女話想做警察，個仔想做老師，我會同佢講番，佢初時都唔理我，但慢慢佢會聽，希望佢慢慢習慣，才準備做爸爸。我覺得助養對準備做父母嘅人係幾好，既幫到人，又幫到自己，係雙贏。」
姪兒被當透明
苟姑娘還會定時帶兩歲多的姪兒到家中，讓老公接觸小朋友的「實體」，可謂用心良苦，不過她笑言老公初時對姪兒視作透明：「姪仔好乖、唔嘈，我畀佢喺屋企行嚟行去，初時陸生成日問幾時帶佢走，慢慢老公就慣咗自己空間裏面有小孩呢個物體，依家開始有互動，絕對係大躍進！」下月23日，她會出席宣明會舉行的「親子歷奇180」任開幕禮嘉賓，當日有難民體驗的親子遊戲，供家長和小朋友玩，她即出口術說：「希望陸生會嚟，唔使再憑空想像家長嘅生活點過！」
化妝/髮型：Amy Lee/Sue Cheung@ Hair Corner K11
服裝：Max Mara
場地：Envy Restaurant & Bar