李佳芯匿沖涼房練歌
藝人李佳芯昨午出席賀年活動兼獻唱，她自言近日常躲在家中練歌：「我匿喺沖涼房練，媽咪話我有呢鋪習慣，細個練琴一樣匿埋。」記者笑指她如此怕醜，當初為何入行？她笑言：「緣分啩，依家我都會面紅。以前唔鍾意講嘢又唔鍾意同陌生人接觸，隔籬位同學仔笑我冇聲音同冇體溫，入行拓闊咗我嘅人生。」
談到即將到來的農曆新年，佳芯表示初一應該有假放：「4月先有劇開，依家忙活動同綜藝節目。（去陳（男友陳炳銓）家拜年？）我又真係未去過佢屋企拜年，通常都係約出嚟食飯，佢都未嚟過我屋企拜年啫。（咁陌生？）新年我未帶過異性返屋企。（佢會係第一個？）唔知喎。」對於男友讚她演技有進步，她開心地說：「佢未喺我面前讚過我，佢係前輩兼專業人士，我梗係開心啦，等陣間打電話問吓佢先。」