學友主場老人病爆發六張嘢舞照跳！

共15場的《A CLASSIC TOUR學友．經典－香港站．再見篇》前晚舉行頭場，學友在一輪演唱後開金口向Fans打招呼。重返主場開騷的他自爆「老人病」爆發：「又感冒、又頭暈、又抽筋、又扭親腰！」笑言入行30多年，近「六張嘢」（60歲）跳舞認真唔講得笑：「如果我跳到都會跳落去！」全場Fans即報以掌聲支持！

瑤華堅拒父女同台

演唱會中段，學友由多位性感女Dancers伴舞，配合巨型舞台及煙火效果，成功震懾Fans眼球！坐在控制台附近的女兒瑤華更興奮得舉手狂搖，全程勁High！惟獻唱《如果這都不算愛》及《我醒著做夢》時，未知是否受病情影響，唱高音時有點聲沙，學友之後問道：「演唱會好睇？其實問呢個問題好冒險，但今次同團隊都出咗120分努力，有諗過就嚟六張嘢做唔做到(口架)？但嚟到第219場就證明我係得嘅！」

學友帶病上陣，但歌照唱，舞照跳，仲有阿女撐場！	放大圖片	緊張到周身唔妥，但學友講明不言休。

騷後，學友為養聲而一次過接受所有媒體採訪，坦言上一站高雄已抱恙，來到終點站又緊張又大壓力，令免疫系統變差：「又扭到條腰，大家見唔到我慣常嘅90度鞠躬，因為後面仲有14場，都想小心啲。本來都想睇醫生，但佢向住好嗰邊去（康復），就唔想睇。（驚影響演出？）梗係驚，呢次開嘅好處係做得耐，試過好多唔同問題，都了解大概有幾大影響，所以控制到。」提到女兒超投入看他演出，學友冧指她是歌迷之一，但對於同台堅決Say No，並透露女兒支持了多場演出。追問家人會否擔心其身體狀況？他坦言：「開演唱會係需要好多體力，佢哋都擔心，但會盡力做完，今日開騷都唔太辛苦。」

再強調唔會封咪

有傳巡唱後會封咪，學友再次澄清：「絕對冇咁嘅事，都唔知係咪啲主辦自己放出去！我真係好鍾意喺台上表演，自己都唔係咁鍾意退休。」提到有少許聲沙，他承認唱慢歌時有發生狀況：「啱啱返嚟，聲未完全開，而且啲音響未校得啲聲好好，大家都要時間適應，反而唱快歌就冇乜嘢。」