黃美棋 劉佩玥輪流做喊包

藝人胡鴻鈞（Hubert）、劉佩玥、黃美棋、朱智賢、黃庭鋒及譚永浩等昨日宣傳劇集《救妻同學會》，劇集將播出大結局，上台分享感受時，美棋忍不住感觸流淚，Moon及朱智賢都眼濕濕，要用紙巾拭淚，其後他們收拾心情分組玩遊戲。

「BB」即將出世

美棋受訪時表示感到非常不捨：「咁眼淺係因為已經一段時間冇拍TVB劇，好開心網友話鍾意我嘅角色，同其他演員建立咗友誼，感覺好複雜！（網友話劇入面你演技最好！）其實大家都好畀心機，個個付出200分努力，可能緊張，希望畀多啲機會我哋一齊進步。（有冇教佢哋做戲？）唔會！佢哋教我就真，互相幫助互相畀意見啦！」

問到2019年有何大計？美棋說：「都係做主持、拍廣告，年中自己嘅BB就出世，就係開台式餐廳！呢個係由細到大嘅夢想，咁啱識咗個朋友，於是我就入少少股。」

Feel到真關心

Moon自認易被觸動，今次是她入行以來遇到最有活力、最團結的一班朋友，Hubert指成班人開工好似玩：「雖然做嘢係辛苦，但遇到呢班人嘻嘻哈哈，有好多回憶。」

劉佩玥起勢抹眼淚。

朱智賢（右起）與黃美棋、黃庭鋒合作愉快，美棋感觸落淚。

Moon難忘拍攝期間三粒淋巴核腫脹，要即時睇醫生：「大家都好錫我，冇怪責我拖慢進度，Feel到佢哋好關心，會輪流摸我下巴。」問到淋巴問題會否復發？她表示已好得七七八八，但若天氣轉變或吃了敏感的東西也有機會翻發，因此平日生活也要多加注意。